BARAYTI AT BARYASYON NG TAGALOG SA PILING BAYAN NG BATAAN: TUNGO SA PAGBUO NG LESSON EXEMPLAR SA FILIPINO

Education

Ang pananaliksik na ito ay naglalayong suriin ang barayti at baryasyon ng wikang Tagalog sa piling bayan ng Bataan, partikular sa aspektong ponolohikal, morpolohikal, at leksikal. Sa kabila ng pagiging bahagi ng Katagalugan, ang Tagalog sa Bataan ay may natatanging anyo na naiiba sa iba pang rehiyon dahil sa impluwensya ng heograpiya, migrasyon, at interaksyon sa iba’t ibang pangkat ng tao. Dahil dito, nagkakaroon ng pagbabago sa mga salitang ginagamit, paraan ng pagbigkas, at kayarian ng mga pangungusap na siyang nagtatakda ng lokal na identidad ng wika sa lalawigan. Gamit ang metodolohiyang field research, nakalap ang datos sa pamamagitan ng panayam at obserbasyon sa pang-araw-araw na komunikasyon ng mga residente sa piling bayan ng Bataan. Pinili ang mga bayan ng Abucay at Orani mula sa unang distrito, Balanga mula sa ikalawang distrito, at Bagac at Morong mula sa ikatlong distrito upang magsilbing kinatawan ng iba’t ibang bahagi ng lalawigan. Ang pagsusuri ay nakatuon sa ponolohikal, morpolohikal, at leksikal na aspekto ng Tagalog na sinasalita sa mga nasabing lugar. Sa pag-aaral na ito, isinasaalang-alang din ang mga panlipunang salik gaya ng edad, tagal ng paninirahan, trabaho, at wikang ginagamit ng mga tagapagsalita upang matukoy ang kanilang impluwensya sa anyo ng wika.Sa pangkalahatan, ang pananaliksik na ito ay naglalayong palawakin ang kaalaman tungkol sa lingguwistikong sitwasyon sa Bataan at magbigay ng konkretong ebidensya sa pagkakaroon ng barayti at baryasyon ng Tagalog sa lalawigan. Sa pamamagitan ng ganitong pagsusuri, mas mapapalalim ang pagpapahalaga sa wika bilang mahalagang bahagi ng kultura at identidad ng isang rehiyon.

This work is licensed under a Creative Commons Attribution-ShareAlike 4.0 International License.